Tag Archives: Nargis

Bad Dream

Advertisements

3 Comments

Filed under Experience, Nargis

နာဂစ်အလွန် ခရီးသွားမှတ်တမ်း (၁၀)

နာဂစ်အလွန် ခရီးသွားမှတ်တမ်း (၁၀)

ဝေကြ၊ ပျော်ကြ

လှူမယ့်ရွာ ရောက်ပြီဟု လက်ညိုးညွှန်ပြသောအခါ မယုံနိုင်ဖြစ်နေသည်။ အုတ်တိုက်လိုလို အဆောက်အအုံတစ်ခုသာ ရေးရေးမြင်ရပြီး သစ်ပင်အကျိုး၊ အလဲများမှတပါး ဘာမှ မတွေ့။ စက်လှေက ထိုကျွန်းကို ချဉ်းကပ်လာသည်။ အသစ်ပြန်ဆောက်ထားပုံရသော အိမ်ကလေး တစ်လုံးစ နှစ်လုံးစ တွေ့ရသည်။ စောစောကတွေ့လိုက်သော အုတ်တိုက်မှာ အမိုးပွင့်နေသည့် ဘုန်းကြီးကျောင်းဖြစ်နေသည်။ ရွာနာမည်က လိပ်ကျွန်းရွာတဲ့။

ဖြတ်လာခဲ့သည့် ရွာ၊ အိမ်စုလေးတွေတိုင်းလိုလို မျှော်လင့်မျက်နှာလေးတွေနှင့် ကမ်းစပ်မှာ ထွက်ငေးနေတာ မြင်ခဲ့ရသည်။ ဤရွာပျက်ကလေးတွင်လည်း ထိုနည်းနှင်နှင်။ ကျနော်တို့ စက်လှေ သူတို့ရွာကမ်းသို့ ကပ်မည်သေချာသောအခါ လူတစ်ယောက်သည် အော်ဟစ်လျက် ရွာပျက်ထဲ ပြေးဝင်သွားသည်။ လှေဆိပ်သည် ဘုန်းကြီးကျောင်းဝင်းအစပ်တွင် ရှိ၏။ ကလေးတွေက ကြိုအံ့ဟု အရင်ဆုံးပြေးလာကြသည်။ အင်္ကျီမပါသူလည်း မပါ။ ဗိုက်ပူနံကားနှင့် ဆူဖြိုးနေသော ကလေး တစ်ယောက်မှ မရှိ။ ပိန်ပိန်လိမ်လိမ်။ ဘယ်သူမှ ဖိနပ်မရှိ။ နောက်တွင် ယောင်္ကျားတစ်အုပ်က ပစ္စည်းကူညီ သယ်ပိုးအံ့ဟု အသော့လိုက်လာကြသည်။ သူတို့လည်း အထက်ပိုင်းကိုယ်ဗလာ။ လူလတ်ပိုင်းအရွယ် ကျောင်းတိုင်ကိုယ်တော်လည်း ဆင်းလာပြီး ကြိုသည်။


ပစ္စည်းတွေ ကျောင်းရှေ့မှာပုံ၊ ဝေကြဖို့ လုပ်။ ကျနော်က ယူလာတဲ့ ဆေးအိတ်ကလေးဆွဲပြီး ရွာထဲဝင်။ ဆေးအိတ်ဆိုလို့ အထင်မကြီးကြပါနှင့်ဦး။ ဆေးတွေထည့်ထားတဲ့ ကျွတ်ကျွတ်အိတ်ကလေးသာဖြစ်ပါသည်။ ဖျားနာနေသူ၊ ထိခိုက်ရှနာရသူတွေကို ဆေးဝေပေးသည်။ ကျနော့်ကို ဆရာဝန်ထင်၍ အူယားဖားယား လာခေါ်သူလည်းရှိရာ မဟုတ်ကြောင်း မနည်းရှင်းပြရသည်။ ဂရုဏာလည်း သက်မိသည်။ ပိုသည့်ဆေးများကို အမျိုးအမည်ခွဲခြားပြပြီး ဦးဇင်းတစ်ပါးထံအပ်ခဲ့သည်။

ပစ္စည်းဝေရာ စနစ်တကျတော့ရှိသည်ဟု ချီးကျူးမိသည်။ ကျောင်းထိုင်ကိုယ်တော်နှင့် စာသင်ဖက် ကိုယ်တော်က မန္တလေးက ဆင်းလာပြီး စီမံပေးနေသည်။ ရွာရှိ အသက်ရှင်ကျန်သော လူစာရင်းကို ပြုစုထားပြီး ယင်းစာရင်းနှင့် တိုက်ဆိုင်၍ ပစ္စည်းဝေသည်။ ဆန်၊ ရေသန့်၊ ခေါက်ဆွဲ၊ အ၀တ်အစားမျိုးစုံ။ နာဂစ်အပြီး ဘယ်သူတွေ ကူဖို့လာသလဲဆိုတော့ ခရိုင်မှူးဆိုတာ ဆင်းလာတယ်တဲ့၊ ကူစရာတော့ ဘာမှ မသယ်လာပါတဲ့။ အခြေအနေလာကြည့်တာတဲ့။ သူတို့ ပြန်သွားပြီး တစ်ပတ်လောက်ကြာမှ ရေတွေသယ်လာတဲ့ ကြက်ခြေနီစက်လှေရောက်လာပါသည်တဲ့။

လေ၊ မီး၊ ရေ

ရွာအထဲ အထိ ထပ်ဝင်ဖို့ သူငယ်ချင်းကို ခေါ်ပြီးအလာ၊ ရေထုတ်တစ်ဖက်၊ ကလေး ခါးထစ်ခွတစ်ဖက်၊ ဆန်အိတ်ခေါင်းရွက်ထားသော မိန်းမတစ်ယောက်ကို တွေ့၍ ပစ္စည်းတွေ ၀ိုင်းသယ်ရင်း ရွာအခြေအနေ မေးရသည်။ ရွာတောင်ပိုင်းနှင့် မြောက်ပိ
င်းဟူ၍ရှိရာ မြောက်ပိုင်းတွင် အိမ်နှစ်လုံးနှင့် ဘုန်းကြီးကျောင်းပဲ ကျန်သည်။ အိမ်နှစ်လုံးအနက် တစ်လုံးမှာ အမိုးမရှိတော့၊ အိမ်နော်ကခြမ်း ပွင့်ထွက်နေသည်။ လိပ်ကျွန်းတွင် လူ ၂၅၀ အနက် ၆၂ ယောက် သေသည်။ ရွာတောင်ပိုင်းမှာ တစ်ရွာလုံးကုန်ပြီဟုဆိုသည်။ အလောင်းတွေတောင် အကုန်ပြန်မရဟု ဆိုသည်။ လယ်ထဲမှ ရသည့်အလောင်းတွေကို မုန်တိုင်းပြီးနောက် မြစ်ထဲ မျှောချပစ်သည်ဟု ရွာထဲမှ အမျိုးသမီးက ရှင်းပြသည်။ မီးမရှို့ဘူးလားမေးတော့ ဓာတ်ဆီမရှိလို့တဲ့။ သောက်ရေ ဘယ်ကရလဲဟု တီးခေါက်ကြည့်သည်။ မိုးရွာတုန်းက ခံထားတာတဲ့။ ကုန်သွားတာ ရက်အတန်ကြာပြီဟု ဆိုသည်။ ဒါဖြင့် အခုရေဘယ်လို သောက်လဲဆိုတော့…။ သောက်ရေကန်တွေက ဒီရေတက်တုန်းက ရေငန်တွေ ၀င်ကုန်သည်။ ခံထားတဲ့ မိုးရေကုန်တော့ ရေငန်ဝင်နေတဲ့ သောက်ရေကန်ထဲက ရေပဲ သောက်ကြသည်။ သောက်လေ ငတ်မပြေဆိုတဲ့ ရေငန်တွေပေါ့။


ဟိုးဘက်က ဘာရွာတွေလည်း မေးတော့ ကံစုတဲ့။ ပြီးတော့ သူဆက်ပြောတဲ့ ရွာတွေ ကျနော်မမှတ်မိပါ။ ယခုကျေးရွာအုပ်စုတွင် ရွာငါးရွာပါသည်ဟု ဆိုသည်။ အဲဒီဘက်ရွာတွေ ဘယ်သူမှ မရောက်ကြသေး။ (ဤဆောင်ပါးမရေးခင် ကိုဇာဂနာက သူတို့ ကံစု ရောက်ခဲ့သည်ဆို၍ ၀မ်းသာရသည်။ လိပ်ကျွန်းဟိုးဘက် သံဒိတ်ဘက်ကိုလည်း သူငယ်ချင်းများ ယခုတစ်ပတ်ထဲ သွားမည်ဆို၍ ၀မ်းမြောက်ရသေးသည်။) သူ့အိမ်သေးသေးလေးပေါ် ပစ္စည်တွေ တင်ပေးလိုက်တော့ `ထိုင်ပါဦး၊ တစ်ခုခုကျွေးချင်လို့ပါ´တဲ့။ မစားရက်လို့ မစားခဲ့ပါဘူး။


စာသင်ကျောင်း၊ စာကြည့်တိုက်

အပြန်မှာ ကလေးမလေးနှစ်ယောက်နှင့် စကားပြောလာသည်။ စာသင်ကျောင်းရှိလားဆိုတော့ ရှိပါတယ် ဟိုမှာတဲ့။ ကြည့်လိုက်တော့ အပျက်အစီး အပုံတစ်ပုံတွေ့ရသည်။ ရွာထိပ်က ကလေးတွေ ပြေးမြင်သည်။ ဆရာ၊ ဆရာမတွေရောဆိုတော့ သူတို့ရွာမှာ ဆရာမပဲ လာသင်သည်တဲ့။ ဟိုးဘက်ရွာက လာသင်တာ ခုတော့ သူ့ရွာကို ပြန်သွားပြီတဲ့။ စာသင်ကျောင်းမရှိခင် ဘုန်းကြီးကျောင်းမှာတော့ စာသင်လို့ ရကောင်းပါရဲ့ဟု တွေးမိသည်။


တနေရာအရောက် စာအုပ် အပြုတ်တစ်ခုတွေ့၍ ကောက်ယူကြည့်ရာ ဓမ္မပဒ၀တ္တု မြန်မာပြန် ရှေးပုံနှိပ်စာအုပ်ထဲမှ ဖြစ်ကြောင်းတွေ့ရသည်။ ဒါရှားပါးစာအုပ်ပဲကွ ဟု သူငယ်ချင်းကို ပြောလိုက်ရာ နောက်ကလိုက်လာသော ကလေးမက `စာကြည့်တိုက်က ဟိုမှာလေ´ဟု ပြသည်။ ပြိုကျနေသော အဆောင်ငယ်လေးအောက်ရှိ ရေထဲတွင် စက္ကုတွေ တဖွေးဖွေးတွေ့ရသည်။


ရွာလုံးကျွတ်

ဘုန်ကြီးကျောင်းပြန်ရောက်တော့ ကျောင်းပေါ်တက်ကြည့်သည်။ ရွာသားနှစ်ယောက်က အစ်ကိုလာ ဟုဆိုကာကျောင်းအပေါ်ထပ်ပြတင်းပေါက်ကနေ ညွှန်ပြသည်။ အုန်းပင် ကျို့တို့ကျဲတဲ နှင့် အိမ်ပြိုတစ်လုံးမြင်ရသည်။ `အဲဒါ ရွာတောင်ပိုင်းပဲ၊ တစ်ရွာလုံးမှာ အဲဒီအိမ်ကြီးတစ်လုံးပဲ ကျန်တယ်။ အကုန်ပါသွားတာ´ဟု ရှင်းပြသည်။ အမှန်ပင် ရွာဟု ပြာရန်ပင် ခက်နေသည်။ `လူသေတာ သစ်ပင်ပိ၊ အိမ်ပိလို့လား´ ဟု ကျနော်က မေးကြည့်သည်။ ရွာသားနှစ်ယောက်က ကျနော့်ကို ပြူးကြောင်ကြောင် ပြန်ကြည့်ပြီး `မဟုတ်ဘူးဗျ။ တစ်ရွာလုံးကျွတ်ပြီး မုန်တိုင်းနဲ့ပါသွားတာ´ဟု ဆိုသည်။ ရွာလုံးကျွတ်ဆိုတာ ဒါမျိုးဖြစ်မည်။

`သူ့မိသားစုနဲ့ ဆွေမျိုးတွေမှာ သူတစ်ယောက်ပဲ ကျန်တယ်။ သူ့မိန်းမနဲ့ သားနှစ်ယောက် ပါသွားတယ်´ ဟု ရွာသားတစ်ယောက်က နံဘေးမှ ခပ်ရွယ်ရွယ်လူကို ပုတ်ပြပြီးပြောသည်။ `သူက အဲဒီတောင်ပိုင်းကလေ´ဟု ဆက်ရှင်းပြသည်။ ထိုလူရွယ်မှာ အသက် ၂၅၊ ၂၆ ၀န်းကျင်ခန့်ရှိပုံရသည်။ မျက်နှာမှာ မျှော်လင့်ချက်မဲ့၊ အူကြောင်ကြောင် မျက်နှာမျိုး ဖြစ်သည်။ အခုဘယ်မှာနေလဲ မေးကြည့်တော့ ဘုန်းကြီးကျောင်းမှာတဲ့။

`ကျနော်ကတော်သေးတယ်။ ယောက်ျားမို့လို့။ နောက်မိသားစုတစ်စုဆို မိန်းမတစ်ယောက်ပဲ ကျန်တယ်။ ပိုဆိုးတယ်။´ဟု သူက ပြောနေသေးသည်။ ထိုအမျိုးသမီးမှာ တခြားရွာက ဆွေမျိုးတွေဆီ ထွက်သွားပြီဟုဆိုသည်။

`အစ်ကို အိမ်လည်း မရှိတော့ဘူးပေါ့´

`မရှိတော့ဘူးဗျ။´

`ဘာဆက်လုပ်မလဲ´

`အိမ်လည်းမရှိတော့ဘူး။ မိသားစုလည်း မရှိတော့ဘူး။ ဒီမှာ မနေချင်တော့ဘူး။ တခြားရွာမှာ အစ်ကိုဝမ်းကွဲတော်တဲ့သူရှိတယ်။ အဲဒီမှာပဲ သွားနေတော့မယ်´


သူ့မျက်နှာမှာ အဓိပ္ပာယ်ဆိုသည်ကို ရှာမရတော့ပါ။ သူ့လက်ကို ဆွဲပြီး ငွေနှစ်ထောင် ထည့်ပေးတော့ မယူပါဘူးဟု ငြင်းသည်။ ကျနော်လည်း လက်ဖက်ရည်ဖို့လို့ ပြောရမလား၊ အလှူလို့ ပြောရမလား ဘာပြောရမှန်းမသိဖြစ်နေစဉ် အကြံရပြီး အစ်ကိုတွေရှိတဲ့ ရွာဆီသွားရင် လမ်းစရိတ်ပေါ့ဟု ဆိုကာ အတင်းထည့်ပေးခဲ့ပါသည်။

ရေတက်ရင် မောင်းရခက်တယ်ဟု လှေဆရာလောဆော်၍ ပြန်ကြဖို့ နိုးဆော်ရသည်။ ဘုန်းကြီးကျောင်းဝတွင် တချို့က ဖိနပ်ချွတ်ထားခဲ့ရာ ကလေးတွေက စောင့်ပေးသည်။ ပြန်အထွက်မှာ ထိုကလေးတွေအတွက် အ၀တ်တချို့ဖယ်ထားပြီး ဝေပေးသည်။ လှေဆရာနှင့် လှေသမားတွေ အတွက် အ၀တ်တချို့ပေးတော့ ပျော်နေကြသည်။ အပြန်မိုးရွာသည်။ ဒုက္ခသည်တွေ သောက်ရရမှာမို့ မိုးရွာတာ ဒီတစ်ခါ ပျော်မိသည်။ လှေဆိပ်အ၀င်မြစ်ဝရှိ စက်လှေခေါင်မိုးပေါ်တွင် စက်သေနတ်ကိုင်ထားသော စစ်သားတစ်ယောက် ပင်လယ်ဝဘက်မျှော်ငေးနေတာ တွေ့ရသည်။

သင်ကာ

မေ၊ ၂၀၀၈

Leave a comment

Filed under Article, Experience, Nargis

သဘာဝကပ်ဘေးအလွန်နှင့် ကလေးများ၏ စိတ်ဒဏ်ရာ

၇.၂.၂၀၀၅ ထုတ် နိုင်ငံတကာ သတင်းလွှာဂျာနယ်တွင် `ဆူနာမီရိုက်ခတ်မှုနှင့် ကလေးများ၏ စိတ်ဒဏ်ရာ´ အမည်ဖြင့် ဆောင်းပါးတစ်ပုဒ် ကျနော်ရေးခဲ့ပါသည်။ ထိုဆောင်းပါးထဲမှ ယခု နာဂစ်အလွန် ပြန်ထောင်ထူထောင်ရေးတွင် အထောက်အကူပေးနိုင်မည်ဟု ယူဆသော အချက်အလက်များကို ပြန်လည်တင်ပြထားပါသည်။ အင်တာဗျူးနှင့် ရည်ညွှန်းစကားများမှာ ဆူနာမီဖြစ်စဉ်အတွက် ဖြစ်သော်လည်း နာဂစ်အလွန်ထူထောင်ရေးတွင် သတိပြု လိုက်နာစရာများဟု မြင်မိပါသည်။ ဤဆောင်းပါးကို လွတ်လပ်စွာ ကူးယူ ဖြန့်ချိ ဖော်ပြနိုင်ပါသည်။

ခင်မင်လေးစားစွာဖြင့်

သင်ကာ

စစ်ပွဲတစ်ပွဲ ဆင်နွှဲရသောအခါ မတိုက်ခိုက်ကြရမည့်နေရာ၊ မထိခိုက်သင့်သူများ၊ အရပ်ဘက်နေရာ၊ စစ်ဘက်နေရာ စသည်ဖြင့် ချုပ်ကိုင်တားမြစ်ခြင်း၊ စောင့်စည်းခြင်း လုပ်နိုင်သေးသည်။ ရေကြီးခြင်း၊ မုန်တိုင်း၊ ငလျင်စသော သဘာဝဘေးဒဏ်များ ကပ်ရောက်နှိပ်စက်သည့် အခါတွင်မူကား စောင့်စည်းအပ်သောအရာ အားနည်းခြင်း အားများခြင်း ကျောသားရင်သားဟူသည်မရှိပြီ။ အားလုံးထိခိုက်ကြ ဒဏ်ခံကြရသည်သာ။

သဘာဝဘေးဒဏ်ကြောင့် ကိုယ့်ကိုယ်ကို ကာကွယ်နိုင်မှု အားနည်းသေးသော ကလေးငယ်များ သေဆုံးရမှုမှာ အများစု ဖြစ်သလို အသက်ရှင်ကျန်ရစ်သော ကလေးငယ်များမှာလည်း စိတ်ပိုင်းဆိုင်ရာထိခိုက်မှု၊ စိတ်ဒဏ်ရာ ဒဏ်ချက်များ ရရှိကာ ကျန်ရစ်ခဲ့ပေသည်။ သဘာဝဒဏ်ခံ ဒေသများအဖို့ အခြေခံလိုအပ်ချက်များဖြစ်သော သန့်ရှင်းသည့်ရေ၊ အစားအစာနှင့် ဆေးဝါးနည်းတူ အကြီးအကျယ် ပျက်စီးသွားရသော ကလေးများ၏ စိတ်ပိုင်းဆိုင်ရာကို ပြန်လည်ထူထောင်ပေးရန် လိုအပ်နေပေသည်။

လူဝီစီယားနားပြည်နယ်၊ နယူးအော်လင်းရှိ အိုချက်စနာ ဆေးပေးခန်းဖောင်ဒေးရှင်းမှ ကလေးအထူးကုဆရာဝန် ဒေါက်တာမိုက်ကယ် ၀က်ဆာမန်က

`စိတ်ပိုင်းဆိုင်ရာ အကျိုးသက်ရောက်မှုဟာ တော်တော်ကြီးမားပါတယ်။ ကလေးတွေက ဘာမှအပြောင်းအလဲမရှိဘူးလို့ နားလည်ထားခဲ့ကြတာ။ ဒီအချက်ကြောင့် အဖြစ်ဆိုးကြီးက သူတို့ကို ဆွဲထုတ်လိုက်သလို ဖြစ်သွားတယ်။ သူတို့နားလည်ထားတဲ့ ကမ္ဘာ ပျက်သုန်းသွားတယ်´

ပြောပြသည်။

ကလေးများ ပြန်လည်နာလန်ထူရေးကူညီရန် အရေးကြီးသော ပထမအဆင့်မှာ သူတို့၏ ပုံမှန်လုပ်ငန်းများ၊ တစ်နေ့တာ လုပ်ဆောင်မှုများ ပြန်လည်ရရှိရေးဖြစ်သည်။ စာသင်ကျောင်းများ ပြန်ဖွင့်နိုင်ရန်မှာ အရေးကြီးသည်။ ကျောင်းသားများ စာသင်ရန် အခြေအနေပေးသည် မပေးသည်က ပဓာနမဟုတ်။ သို့မှသာ သူတို့လည်ပတ်နေကျ ဘ၀ပုံစံမျိုး ပြန်ရောက်နိုင်မည်ဖြစ်သည်။ စာသင်ကျောင်းတွေမှာ ကျောင်းသားတွေ မရှိခြင်းသည် အကြီးအကျယ် ပျက်စီးဆုံးရှုံးမှုပင်။ က
လးများမှာ အခြေအနေအရပ်ရပ်ကို နားလည်နိုင်ရန် ငယ်လွန်းနေသေးသည်။ ဆူနာမီသင့်ပြီးနောက် ပြန်လည်ထူထောင်ရေးတွင် ကလေးများအလွယ်တကူ စုစည်းနိုင်စေရန် တဲကြီးများ ထိုးပေးထားသည်။

သဘာဝဘေးဒဏ်အကြောင်း အဖြစ်အပျက် သတင်းဇာတ်လမ်း ဓာတ်ပုံတို့သည် ဘေးဒဏ်သင့် ဒေသမှ ကလေးများကိုသာမက အခြားအရပ်တပါးမှ ကလေးများအတွက်လည်း စိတ်ပိုင်းဆိုင်ရာ ထိခိုက်မှုကို ဖြစ်စေသည်။ သေဆုံးမှုနှင့် ပျက်စီးမှု သတင်း ဓာတ်ပုံများသည် ကလေးများ၏ စိတ်တွင် လုံခြုံမှုအတွက် စိုးရိမ်ထိတ်လန့်မှုဖြစ်စေသည်။

ထို့ကြောင့် ကလေးအထူးကု ဒေါက်တာဝက်ဆာမန်က

`ကလေးတွေ မခံစားနိုင်တဲ့ သတင်းမျိုးကို ကလေးတွေနဲ့ မထိတွေ့အောင် ဂရုစိုက်သင့်တယ်လို့ ကျနော်ထင်တယ်။ ၁၂ အရွယ်ကလေး ခံစားနားလည်နိုင်တာကို ၆ နှစ်အရွယ်ကလေး မခံစားနိုင်ဘူး´

ဟု ပြောသည်။ ဟောင်ကောင်မှ ၆ နှစ်အရွယ် ကျောင်းသားလေး ဇာဗီယာလီကဲ့သို့သော ကလေးများမှာ ဆူနာမီ၏ ကြေကွဲဖွယ်ဒဏ်ချက်များ ရိုက်ခတ်မှုကို ခံရသည်။

`လူတွေ အများကြီးသေလို့ သားစိတ်ထဲမှာ ၀မ်းနည်းတယ်´

လို့ ဇာဗီယာက ပြောပြပါတယ်။ ကြေကွဲဖွယ် ဇာတ်လမ်းများနှင့် ပတ်သက်၍ မိဘများ၊ ဆရာများက ကလေးများရှေ့တွင် များများစားစားမပြောကြရန်နှင့် ပြောရလျှင်လည်း ကလေးများ နားလည်သလောက်သာ ပြောရန်၊ သတင်းအချက်အလက်များ များပြားစွာ ပေးခြင်း၊ နားထောင်စေခြင်း၊ မေးသမျှ ဖြေခြင်းအားဖြင့် ကလေးများအတွက် အသိတရားပေးရာ မရောက်ဘဲ အကြောက်တရားပေးရာရောက်သည်ဟု ဒေါက်တာဝက်တာမန်က အကြံပြုသည်။

ကလေးများ၏ ကိုယ်ရည်ကိုယ်သွေးပြောင်းလဲခြင်းနှင့် အိပ်ပျော်သည့် ပုံစံကိုကြည့်၍ ကလေးများ စိတ်ဓာတ်ကျမှုကို ခန့်မှန်းနိုင်သည်။ ၀မ်းဗိုက်အောင့်ခြင်းသည်လည်း ကလေးများ စိတ်ကျရောဂါ ခံစားရခြင်း၏ လက္ခဏာတစ်ရပ်ဖြစ်သည်။ ကလေးများ ကူမရေးအဖွဲ့မှလည်း လူကြီးများက ကလေးတို့၏ အပြုအမူကို ဂရုပြု ကြည့်ရှုရန် အကြံပေးထားသည်။ ကလေးများသည် ပတ်ဝန်းကျင်၏ လွှမ်းမိုးမှုကို မကြာခဏ ခံရတတ်သည်။

လူကြီးများက ပြုမူတုံ့ပြန်ပုံမျိုး ကလေးများက တုံ့ပြန်မည်ဟု မမျှော်လင့်အပ်ပေ။ အကျိုးသက်ရောက်မှုမှာ တမျိုးတဘာသာဖြစ်နိုင်သည်။ အတိတ်တွင် ကြုံခဲ့သော ဘေးဒဏ်ခံကလေးများကို တိုးတက်မှုကို ကြည့်ခြင်းအားဖြင့် ကလေးများသည် မကြာမီစိတ်ပိုင်းဆိုင်ရာများ ပြန်လည်တိုးတက်ကောင်းမွန်လာမည်ဟု ယုံကြည်ရသည်။

`ကလေးတွေဟာ ဖရိုဖရဲဖြစ်သွားတဲ့ သူတို့ဘ၀နဲ့ သူတို့မိသားစုတွေ ဆုံးရှုံးသွားတာကို နားလည်လာမှာပါ။ စိတ်ဖိစီးမှုတွေကို တွန်းလှန်လာနိုင်မှာပါ။ ကျနော်တို့ အတွေ့အကြုံအရ အနာဂတ်မှာ သူတို့ ပြန်လည် ရပ်တည်နိုင်ပြီး ရှင်သန်နိုင်ပါလိမ့်မယ်´

ဟု ကလေးများကူမရေးအဖွဲ့မှ အရာရှိကပြောသည်။

သင်ကာ

ရည်ညွှန်း။ ။ Treating Children’s Emotional Wounds

Leave a comment

Filed under Article, Nargis

နာဂစ်မတိုင်ခင် ရန်ကုန် vs နာဂစ်အပြီး ရန်ကုန်

ရန်ကုန်မှာ ရေးဖြစ်တဲ့ ရန်ကုန်အကြောင်း ကဗျာပါ။ စွဲလမ်းလွန်းလို့ ဖွဲ့တည်ရာမဂ္ဂဇင်းမှာ ခွင့်တောင်း ဖော်ပြဖူးတဲ့ ကိုငြိမ်းဇေဦးရဲ့ `တို့မြို့ကြီးရဲ့´နဲ့ တွဲပြီး ဖော်ပြလိုက်ပါတယ်။ အရင်နဲ့ အခု ရန်ကုန်မှာ ဘာတွေထူးသွားလည်း ပေါ်စေချင်လို့ပါ။

တို့မြို့ကြီးရဲ့…

ငြိမ်းဇေဦး

ပေကပ်ကပ်နွားနဲ့

ဆွဲတဲ့ မြို့ပြကြီး…

အမောဖောက် လျှာထွက်

ပက်လက်မျော…

မှောင်မိုက်ခြင်းတွေ စည်ကားသောအခါ

ဒါ…ရန်ကုန်ပေါ့ကွယ်။

အသံတွေတောင်တုန်လို့…။

ငြိမ်းဇေဦး

ရူးသွားတဲ့ရန်ကုန်

သင်ကာ

လေယာဉ်ကွင်းအ၀က

အကိုင်းတွေ စိုက်ကျနေတဲ့ အုန်းပင်တွေ

ငိုမြည်းနေတာ မဟုတ်ဘူး။

နှစ်သီးစားရှာတဲ့ တက္ကစီသမား

ဒီအချိန် ဒေါမနဿန မပွားနိုင်ဘူး

သနားခြင်းထက်ပိုတာ

ရန်ကုန်မှာ ဘာမှ မရှိနိုင်ဘူး

ကိုယ်က

ခုလေးတင် ဘီးစတိတ်တစ်ပွဲ

စားခဲ့တဲ့ကောင်ကိုး။

ရန်ကုန်ညဟာ

သုညသက်သက်

မီးပျက် ရေပျက်

မနက်မိုးအလင်းမှာ

လိုက်ကာ အဖွင့်

ရင်နင့်နေတဲ့ရန်ကုန်ကို တွေ့တယ်

ရူးသွားတဲ့ ရန်ကုန်။

ရက်စွဲတပ်တော့မှ

ငါ့မွေးနေ့က ဒီနေ့လို့

သတိရတော့တယ်။

စိတ်ပျက်တိမ်လုံးတွေနဲ့

ကြိမ်မီးအုံးထားတဲ့ ရန်ကုန်

ခုန်ခုန်ထွက်နေတဲ့ ထောင်တန်တွေဟာ

အာဏာမဲ့ စက္ကူတွေ ဖြစ်ကုန်တယ်။

သင်ကာ

Leave a comment

Filed under Experience, Nargis, Poem

ဇာဂနာနဲ့ ဖား၊ ငါး အဖြေ

မေး။ တနေ့က မြန်မာ့အလင်းမှာ လူတွေကို ဖားရှာ၊ ငါးရှာစား နောက်နှစ်ဆို ဧရာဝတီမြစ်ဝကျွန်းပေါ်မှာ စပါးတွေ ရွှေရောင်းသမ်းပြီးတော့ ပြန်လည်ထူထောင်ရေး လုပ်ငန်းနဲ့ စည်ပင်တော့မယ်လို့ ရေးထားတယ်။ အဲဒါ ဖြစ်နိုင်ပါ့မလား ခင်ဗျ။
ဖြေ။ အဲဒီအိပ်မက်ကလေး ကောင်းသားပဲလို့ ကျနော်ပြောချင်တယ် ဟဲ ဟဲ ဟဲ ဖားရှာ၊ ငါးရှာ ရှာလို့ ရမလားတော့ မသိဘူး ဧရာဝတီမြစ်ကြီးနဲ့ ဘိုကလေးမြစ်ဆိုရင် ရေအရောင်ကို နာမည်ပေးထားတယ်၊ နာဂစ်ကာလာလို့။ ဘာလဲဆိုတော့ ဖြူဖြဲဖြဲ အရောင်ကြီး၊ အဲဒီအရောင်ကြီးနဲ့ လူနဲ့ ကျွဲ နွားအလောင်းတွေက အများကြီး နာဂစ်ရနံ့ ဆိုတာရှိသေးတယ် အဲဒီညှီနံ့ကြီးက ပြန်လာရင် ပါလာတာပဲ၊ ဘယ်သူမှ မခံနိုင်ဘူး အန်တယ်။ ဒီတော့ အဲဒီလို နေရာတွေမှာ ဘယ်လိုလုပ်ပြီး ငါးရှာ၊ ဖားရှာမှာလဲဗျာ ငါးဖမ်းမယ့်အစား အလောင်းတွေ ဖဲ့စားမှ ရတော့မယ်။

(အင်တာဗျူးတွင် လူမှုကယ်ဆယ်ရေးလုပ်နေသော လူရွှင်တော်ဇာဂနာ၏ အဖြေ)

Leave a comment

Filed under Nargis

နာဂစ်မြစ်၊ နာဂစ်ကြိမ်စာ

နာဂစ်အလွန် ခရီးသွားမှတ်တမ်း (၉)

(မဇ္ဈိမတွင် ဖော်ပြပြီး)

လှေဆိပ်နှင့် ကူလီ

ကွမ်းခြံကုန်းရှိ လှေဆိပ်သို့ ရောက်လာသည်။ ရှေ့ဆက်သွားသူရှိသလို ဤလှေဆိပ်မှ နေ၍ ပင်လယ်ဝရှိရွာများသို့ သွားကြသည်လည်း ရှိသည်။ ကျနော်တို့ကား တက်ကြွသောလူငယ်အများစုပါသူများပီပီ ခပ်ဝေးဝေး လိပ်ကျွန်းအထိ သွားကြမည်ဖြစ်သည်။ အတွေ့အကြုံရှိပြီး ဦးဆောင်လူငယ်သည် တနေ့ကတည်းက ကွမ်းခြံကုန်းကို ကြိုလာပြီး စက်လှေငှားထားပြီးဖြစ်၍ စက်လှေက အသင့်စောင့်နေသည်။ ကြိုတင် မစီစဉ်နိုင်သူမှာ ၉၈ ရာခိုင်နှုန်းဖြစ်ရာ စက်လှေငှားမရ၊ ငှားရတော့လည်း လှေဆိပ်ကပ်ဖို့ မရှိဖြစ်နေရသည်။ တချို့လည်း ခရီးသင့်ရာ စုငှားသွားကြသည်။ ထိုနေ့အဖို့ ကျနော်တို့ အစုသာ အဝေးဆုံးခရီးနှင်ကြသည့် အဖွဲ့ဟု ထင်ပါသည်။


ငွေကျပ်တစ်သိန်းကျော်ဖြင့် ကြိုငှားထားသော စက်လှေက ကမ်းကပ်ဖို့ ကြိုးစားချိန် ကျနော်တို့ကလည်း အထုပ်တွေ ကားလမ်းပေါ်ကနေ ရေစပ်အထိ ထမ်းချဖို့ လုပ်ရသည်။ မျက်နှာငယ်လေးများနှင့် ကုန်ထမ်းသမားများကို ငှားလိုက်ချင်သော်လည်း ကိုယ်တွေအဖွဲ့မှာ လူငယ်ယောက်ျားလေးတွေ အများကြီးရှိသည်နှင့် ကိုယ့်ဖာသာ ထမ်းချကြသည်။ ကျနော်လည်း လိုလိုလားလားပင် ကျရာအထုပ် ၀င်ထမ်းပြီး စေတနာကူလီလုပ်ပါသည်။ ထိုအချိန် ထိုနေရာမျိုးတွင် လူတိုင်းလိုလိုပင် ကိုယ်ချင်းစာချင်း၊ လူသားအချင်းချင်း မေတ္တာထားခြင်းတို့ဖြင့် ပြည့်လျှမ်းနေကြချိန်။ ဘာပဲ ကူညီရ ကူညီရဆိုတာမျိုး။ မိဘဆီမှာ ဘော်ကျော့ ဆိုးပေနေသူ လူငယ်လေးများမှာလည်း တစ်သက်နှင့်တစ်ကိုယ် မထမ်း ကြည့်ဖူးသည့် ဆန်အိတ်ကြီးကို သူထမ်းမယ် ငါထမ်းမယ် လုပြီး ကုသိုလ်ယူ ထမ်းချင် နေကြသည့် မြင်ကွင်းကို မြင်ကြစေချင်ပါဘိ။ ကူလီလုပ်ရင်း ချွေးတလုံးလုံးကြားမှာ ပြုံးနေနိုင်ကြပါသည်။


နာဂစ်မြစ်၊ နာဂစ်မြင်ကွင်း

လှေဆိပ်မှ အထွက်တလျှောက် မြစ်ကမ်း အိမ်ယာတွေမှာ ရစရာမရှိ။ အလဲလဲ အပြိုပြို။ ပွင့်ထွက်နေသည့် ဂိုဒေါင်ကြီး သုံးဆောင်မှာ အသစ်ပြီးကာစ ဖွင့်ပွဲတောင် မလုပ်ရသေးပါတဲ့။ အမိုးအကာ ဘာမှ မရှိပဲ ထုတ်လျောက် တန်းလျားပဲ ကျန်သော ကြီးမားလှသည့် ဂိုထောင်ကြီး။

တချို့ စက်လှေ၊ သမ္ဗာန်ကြီးများမှာ မြုပ်တစ်ဝက်၊ ပေါ်တစ်ဝက်။ ခေါင်းစိုက် ဖင်စိုက်။ ကမ်းတစ်လျောက် လူနေအိမ်ခြေတွေမှ မဆုံးသေး၊ ဓနိတောတစ်ခုကြားမှာ လူသေအလောင်းတစ်ခုက ဖောင်းကားလျက်။ မုန်တိုင်းပြီး၍ ရက်နှစ်ဆယ်ပင်ကျော်ခဲ့ပြီ။ လူတွေနဲ့နီးနီး အလောင်းတွေရှိနေတာတွေ့
တော့ အံ့သြမိသည်။ ဒီလို အလောင်းမျိုးကို ဖယ်ဖို့ခက်မည်ဟုတော့ ခန့်မှန်းမိသည်။ ဓနိတောစပ်ကို ဒီရေနဲ့ မျောဝင်တုန်းက မပုပ်ပွသေး။ အထဲရောက်ပြီး လူသေက ပွပြီးဖောင်းလာတော့ အပြင်ပြန်မရောက်တော့ဘဲ ဓနိတောရှုပ်ရှုပ်ထဲမှာ ပိတ်မိနေတာမျိုး။ ၀ါးနဲ့လည်း ထိုးချ၍ မရ၊ လူဝင်ပြီးဆွဲလို့လည်း မရ။ ဒီအတိုင်းဖြစ်နေသည်။ ဒါက အရေးမကြီး။ ဒီလူသေ ကျွဲနွားသေတွေနဲ့ ရေစီးရေလာ မနီးမဝေးမှာ ယောက်ျား၊ မိန်းမ၊ ကလေးတွေ မြစ်ထဲမှာ ရေချိုးနေကြတာ၊ မြစ်စပ်မှာ မြစ်ရေနဲ့ အ၀တ်လျှော်နေကြတာ။ ရေမှ မရှိဘဲနဲ့။ ဒီဒေသခံတွေ ဘယ်မှာလာ ကျန်းမာကြံ့ခိုင်ကြတော့မည်နည်း။ ဘယ်မှာလာ ကျန်းမာရေးနှင့် ပြည့်စုံတော့မည်နည်း။


တဖြည်းဖြည်းနှင့် လူနေအိမ်ခြေရှိ ကမ်းပါးများ နည်းလာပြီး ကျွန်းကလေးတွေ ဟိုဘက် ဒီဘက်နှင့် မြစ်ပြင်ကျဉ်းလိုက်၊ ကျယ်လိုက်၊ မြစ်ခွဲလက်တက်ရောက်လိုက် တွေ့လာရသည်။ မြစ်ဝအရောက်တွင် စက်လှေဆရာက အလောင်းတွေ ရှိသေးကြောင်းပြောရာ ကျနော် မယုံဖြစ်နေသည်။ နာဂစ်အပြီး ရက်ပင် ၂၀ ကျော်ခဲ့ပြီ။ အလောင်တွေ အရိုးကျလောက်ပြီ။ စက်လှေဆရာစကားမှန်ပေသည်။ ကျွဲနွားအသေတွေ ကမ်းပါးမှာ တွေ့နေရာကနေ ဘွားကနဲဆို ခပ်ပြေပြေရွှံကမ်းစပ်ပေါ်တွင် ဦးခေါင်း၊ ကိုယ်၊ ခြေတံ လက်တံတွေ ရှိသေးသော အလောင်းတစ်ခုကို ကို့ရို့ကားယားနှင့် ဘွားကနဲ တွေ့ရလိုက်ရသည်။ ခရီးသွား အယောက် သုံးဆယ်ကျော်ပါရာ ထိုဘက်ဝိုင်းကြည့်ကြသည်နှင့် စက်လှေကြီးလည်း ယင်းကမ်းပါးဘက် တစ်ခြမ်းစောင်းသွားသည်။ ယောက်ျား မိန်းမ ရေထဲမှာ မှောက်လျက်သေသည်၊ ပက်လက်သေသည်ဟု မြို့သားတစ်စု ငြင်းနေကြဆဲ၊ လှေဆရာစကားကြောင့် တိတ်သွားကြသည်။ `မုန်းတိုင်းအကျမှာ သေရတာ သေချင်သလို သေကြတာပါပဲဗျာ၊ မှောက်လျက် ပက်လက်တွေတောင် မရှိနိုင်တော့ပါဘူး´တဲ့။

လူသေတွေ အရိုးမကျပဲ ခန္ဓာမပျက် ရှိနေသေးခြင်းကို ရှင်းပြချင်ပါသည်။ ရေထဲရောက် အလောင်း တော်တော်များများမှာ အရိုးကျကုန်ပြီဖြစ်၍ မမြင်နိုင်ပြီ။ ကလေးအလောင်းတွေဆို မြန်မြန်ပင် အရိုးကျသွားသည်ဟု ဆိုသည်။ ယခု ရက် ၂၀ ကျော် ကြာသည့်တိုင် တွေ့နေရသေးသည့် အလောင်းများမှာ ရေးစပ်စပ်တွင် တင်နေသော အလောင်းများဖြစ်သည်။ မုန်းတိုင်းအကျ ရေတက်စဉ်က ရေသည် ၁၂ ပေ အမြင့်အထိ တက်သည်ဆို၏။ ကုန်းမြေများမှာ ကျွန်းမြေပြန့်များဖြစ်ပြီး ကျနော်မှန်းကြည့်ရာ ငါးပေ၊ ခြောက်ပေ အမြင့်မျှသာဖြစ်သည်။ ပြေးတက်စရာကုန်းမြင့်မရှိရကား အကုန်သေကြခြင်းဖြစ်သည်။ ထိုအလောင်းများသည် ညဒီရေတက်ချိန်တွင် ဆားငန်ရေထိလိုက်၊ နေ့အချိန်တွင် နေပူကျဲကျဲထိလိုက်နှင့် ရက်အတန်ကြာသောအခါ ဆားစိမ်သော အလောင်းသဖွယ်ဖြစ်ပြီး အရိုးကျခြင်းသို့ မရောက်ဘဲ ဖြစ်ကာ ကျန်နေကြခြင်းဖြစ်သည်။ ကျွဲနွားအသေတွေမှာလည်း ထို့အတူပင်။ အရိုးပေါ်တွင် သားရေတင်ပြီး အကောင်သဖွယ် ကျန်နေသေးသည်။ အနံအသက်မကောင်းသည်နှင့် နှာခေါင်းစည်းများ တပ်ထားရသည်။

ဒီဝဋ် ဘယ်သူလည်မလဲ

စက်လှေအမိုးပေါ်တွင် ကျနော်တို့ ယောက်ျားလေးများနှင့် ဦးပဇင်းတို့ကလိုက်ကြရာ မတ်တပ်ရပ်ကြည့်လျှင် ကုန်းပေါ်အတော်လှမ်းလှမ်းအထ
ိ မြင်ရသည်။ တစ်နေရာအရောက်တွင် လှေဆရာက အစ်ကို မတ်တပ်ရပ်ပြီး ကြည့်လိုက် သေတာနှစ်ရက်ပဲ ရှိသေးတဲ့ နွားတွေ တွေ့ရလိမ့်မယ်တဲ့။ ကျနော်ထရပ်ပြီး ကြည့်လိုက်ရာ မပုပ်သိုးသေးပဲ ခွာတွေ ဂျိုတွေရော အကောင်းအတိုင်းရှိနေသေးသော နွားတစ်ကောင်ကို ကမ်းစပ် တုန်းလုံးလဲလျက်သား မြင်ရသည်။ ဖြစ်ပုံကို ကျနော်သိလိုက်ပါပြီ။

လေမုန်တိုင်းအပြီးတွင် ကျွဲနွားအချို့မှာ မသေသော်လည်း လေ၊ ရေတို့ဖြင့် လွင့်ထွက်ပြီး ခြေ၊ လက်၊ နံရိုးတို့ ကျိုးကာ မသွားနိုင်၊ မလာနိုင် လဲနေကြသည်။ ဆေးကု ရေတိုက် အစာကျွေးမည့် သခင်တို့လည်း မရှိပြီ။ ထိုနေရာအနီးတွင် လူသူ ကျေးရွာကိုလည်း မတွေ့ရ။ စဉ်းစားသာကြည့်တော့။ ညဘက်ကျ အေးလိုက်။ နေ့လည် နေလှမ်းခံရလိုက်။ ခြေကျိုး၊ လက်ကျိုး၊ နံရိုးကျိုး ဒဏ်ရာတွေနှင့် မျှင်းးသတ်သလို ခံစားရမည့် ဒုက္ခ။ အရက်နှစ်ဆယ်လောက် နာကျင်ခြင်းဝေဒနာ၊ ငတ်ပြတ်ခြင်း ဝေဒနာတွေ တမြည့်မြည့်ခံစားပြီး သေရသည့်ဘ၀။ ၀ဋ်ဒုက္ခ ကြီးပေစွဟုသာ စိတ်နှလုံး မသာယာဖြစ်မိသည်။ ဒီလူကျွဲနွားတွေ အဖြစ်မျိုးပဲ လူတွေ မခံရဘူး မပြောနိုင်ပါ။ ယနေ့တိုင် လူသူ အကူအညီ မရောက်သေးသည့် နေရာတွေ ရှိကြပါသေးသည်။ လူတွေသည် လေမုန်းတိုင်း လွင့်ပါကုန်ကြခြင်းဖြစ်သည်။ နေထိုင်သည့် နေရာလေးတွင် ကပ်၍ သေကြ၊ ဒဏ်ရာရကြသည် မဟုတ်ပါ။

ခရီးတစ်လျှောက် ချိုင့်ကမ်းစပ်၊ သစ်ပင်တောရုံတို့တွင် လူသေအလောင်းတွေကို တစွန်းတစရော၊ ပီပီပြင်ပြင်ပါတွေ့ရသည်။ တစ်နေရာတွင် သစ်ပင်အမှိုက်ပုံကြီးလို တွေ့သဖြင့် လှေဆရာကို မေးရာ အရင်က ရွာဟု သိရသည်။ ဘုရားစူး ကြိမ်၍ ရွာဟု ပြောရမလိုပင်၊ အိမ်တိုင်တစ်ငုတ် မကျန်ရစ်ပါ။ သစ်ပင်တွေမှာလည်း အမြစ်လား၊ သစ်ကိုင်းတွေလားဟုပင် ခွဲမရတော့လောက်အောင် ဦးစိုက်တစ်ပင်၊ ကန့်လန့်တစ်ပင်၊ ပြောင်းပြန်တစ်ပင် ဖြစ်ချင်တိုင်းဖြစ်နေတော့သည်။ ဦးခေါင်းမရှိတော့သော မိန်းမဟု ယူဆရသည့် အလောင်းတစ်လောင်းသည် အင်္ကျီအနီလေး ၀တ်လျက်သားနှင့် ထိုကို့ရို့ကားယားသစ်ပင်တွင် ချိတ်နေ၏။ ရေထဲမရောက် ကုန်းပေါ်မတင်နှင့် ဤနည်းနှင်နှင် လူတွေ လူလို မသေရသည့် အဖြစ်တွေကို ရင်နင့်ဖွယ် မြင်တွေ့ရပေသည်။ ဒါကိုမြင်လျင် ကျနော်လည်း ကူညီကယ်ဆယ်ရေးအစား စစ်အစိုးရ အားချင်းလုပ်ခဲ့သော `သောက်မဲပေးပွဲ´ကို ပစ်ပစ်နှစ်နှစ် ကြိမ်ဆဲမိပေတော့သည်။ တုတ်တကားကား၊ သေနတ်တကားကားနှင့် တာဝန်ရှိသူတွေဆိုသည် မဟုတ်တာတွေပဲ လုပ်နေသည်ဟု သွားလေလေ မြင်လေလေ သိရလေလေပင် ဖြစ်သည်။

ရေတစ်ပေါက်

သွားလေလေ တွေ့လေလေ၊ နောက်တော့ ဓာတ်ပုံပင် မရိုက်နိုင်တော့ပြီ။ လှေသမားကမူ ဆေးလိပ်ဖွာ မပျက်။ သူအဖို့ ပို၍ ရိုးလို့နေသော မြင်ကွင်း ဖြစ်ပေမည်။ လေဆရာက အလိုက်သိစွာ သေပျောက်ပျက်ဆီးမှုရှိသော ကမ်းများဘက်သို့ ကျနော်တို့ လေ့လာရအောက် ကပ်၍ မောင်းပေးတတ်ပါသည်။ သူစိတ်လိုလက်ရရှိလျှင်လည်း တစ်ချက်တစ်ချက် ရှင်းပြသည်။ လှေကလေးတစ်စင်းနှင့် ၀မ်းရေးအတွက် ငါးဖမ်းနေသူများကိုလည်း တွေ့ရသည်။ အချို့တွေကတော့ အိမ်ယာလေးများ ပြန်ဆောက်လျက်။ ပြန်ဆောက်သည် ဆိုသော်လည်း ပြန်ကောက် ရသမျှ တိုင်နှင့် ဓနိရွက်ကိုင်းအစို ခုတ်လျက် ဖြစ်သလိုမိုးကြခြင်းသာ။ မိုးရွာလျှင် ခိုစရာရှိဖို့ လိုသည်မဟုတ်လား။


တချို့တွေလည်း စက်လှေကလေးတွေနဲ့ တစ်ရွာမှ တစ်ရွာကူးသည်လား၊ မြို့တက်သည်လားမသိ။ တစ်နေရာတွင် စက်တပ်သမ္ဗာန်လေးပေါ်မှ ယောက်ျားတစ်ယောက်သည် ကျနော်တို့ရှိရာသို့ လှမ်းမျှော်၍ ပါးစပ်ကို လက်မ တေ့ပြချေ၏။ အကြိမ်ကြိမ်လုပ်ပြတော့မှ ကျတော်တို့မြင်လေသည်။ စက်လှေဆရာက ရေတောင်းတာဟု ကျနော်တို့ကို ဘာသာပြန်ပေး၏။ ကျနော်တို့က လက်ရပ်ခေါ်သောအခါ ထိုစက်လှေကလေးထဲတွင် လှဲနေသော အမယ်အိုတစ်ယောက်နှင့် မိန်းမသုံးယောက်တို့ ခေါင်းထောင်လာ၏။ တစ်ဦးမှာ နေမကောင်းဟန်ရှိပြီး အချို့မှာ စိတ်ပျက်အားငယ်နေပုံရ၏။ ကျနော်တို့ စက်လှေအနီး ချဉ်းကပ် လာသောအခါ ရေဗူးငါးယောက်စာ ပစ်ပေးလိုက်သည်။ ကျေးဇူးတင်သော အပြုံးများနှင့် လက်ဝှေ့ရမ်းလျက် ရေဗူးကိုယ်စီ အငမ်းမရဖွင့်နေသော သူတို့ တရိပ်ရိပ်ဝေးကျန်ခဲ့တာ ကြည့်ပြီး မျက်ရည်ဝိုင်းမိသဖြင့် နှာခေါင်းဖုံး (Mask) ကို မျက်လုံးနားအထိ ဆွဲတင်လိုက်မိလေသည်။

သင်ကာ

၂၅ မေ၊ ၂၀၀၈။

Leave a comment

Filed under Experience, Nargis

နာဂစ်အလွန် ခရီးသွားမှတ်တမ်း (၈)

နာဂစ်အလွန် ခရီးသွားမှတ်တမ်း (၈)

မကူညီသည့် အပြင် နှောက်ယှက်သည်

မမျှော်လင့်ဘဲ ဘလော်ဂါအပေါင်းအသင်းတစ်ယောက်နှင့် ချိတ်မိပြီး ခရီးထွက်ဖို့ ပြင်ဆင်ရသည်။ တွံတေး၊ ကော့မှူး၊ ကွမ်းခြံကုန်း၊ ဒေးဒရဲ ခရီးစဉ်ဖြစ်သည်။ အဲဒီကနေ ပင်လယ်ဝကို စက်လှေနဲ့ ထွက်မည်။ မနက် ငါးခွဲဆုံ၊ ခြောက်နာရီထွက်ဆိုသော်လည်း မိန်းကလေးတွေ (အလှပြင်တာလား၊ ထမင်းချက်တာလားမသိ) မရောက်သေး၍ နောက်ကျမှ ထွက်ရသည်။ မဟာစည်က ကိုယ်တော်တစ်ပါးလည်း လိုက်လာသည်။

Check Point ကို စရောက်တော့ ကားအစီး ၂၀ လောက်ပဲ ရှိမည်။ နေ့က တနင်္ဂနွေနေ့။ ဆယ်မိနစ်အတွင်း ကားတွေ အစီး ၂၀၀ လောက်ဖြစ်လာသည်။ Check Point မှ လွှတ်နေသည်က တစ်မိနစ် တစ်စီးတောင် မရှိ။ နောက်မှာတန်းစီလာသည့် ကားတွေက မိနစ်တိုင်းတိုးနေသည်။ ကားကြီးကားငယ်၊ ယောင်္ကျား မိန်းမ၊ လူငယ်လူကြီး၊ မြန်မာ ကုလား မွတ်ဆလင် အစုံစုံ။ ကုမ္ပဏီက၊ အဖွဲ့အစည်းက၊ ရွက်ကွက်က အလှူရှင်လည်း စုံသည်။ လှူစရာတွေလည်း စုံသည်။ အကုန်လုံး တူကြသည်မှာ စေတနာ၊ မေတ္တာပင်

Check Point ကို မယောင်မလည်ကပ်သွားသည်။ လူတွေ အုံတိုးပြီး စာရင်းပေးနေသည်။ ဘာတွေကို Check နေသလဲ။ ကားနံပတ်မှတ်သည်။ သတိပေးကြေညာစာရွက်ပေးသည်။ (ကိုယ်ကမကူ ကူသော်မကြိုက် ပို့စ်တွင်ကြည့်။) ပြီးတော့ ဖြတ်ပိုင်းတစ်ခု။ ကားရှေ့မှာ ကပ်ထားဖို့။ သေချာတာကတော့ ဒေသခံပြည်သူတွေကို Save (ကယ်ဖို့) မဟုတ်ဘဲ သူတို့ (လက်တစ်ဆုပ်စာ) Safe (အဘက်ဘက်လုံခြုံဖို့) ဆိုတာပဲဖြစ်သည်။ ဘာတွေမှန်းမသိ ဆိုင်ကယ်တွေ တကားကား၊ တုတ်တွေ၊ သေနတ်တွေတကားကား။ ဒီနေရာသည် စစ်ဇုန်လည်း မဟုတ်ပါ။ အခု လာလှူသူတွေမှာလည်း ဆန်အိတ်၊ ခေါက်ဆွဲ၊ ဆေးတွေပဲ ပါပါသည်။ ဘယ်သူတွေကို ရိုက်ပြီး ဘယ်သူတွေကို ပစ်ဖို့ တုတ်တွေ၊ သေနတ်တွေ ပြင်ထားကြသနည်း။ နိုင်ငံတကာ ကယ်ဆယ်ရေးလုပ်ငန်းတွေမှာ စစ်တပ်က အမြဲပါပါသည်။ တရုတ်ငလျင်မှာလည်း စစ်တပ်က ကူရပါသည်။ သို့သော် သေနတ်တွေ၊ တုတ်တွေ မပါပါ။ မိုးကာတွေ၊ ပေါက်ပြားတွေ၊ ဆေးအိတ်တွေနဲ့ လာကြပါသည်။ ဘယ်နိုင်ငံကြည့်ကြည့် ဒီလိုပါပဲ။

ကျနော်အမြင်တွင် သူတို့လုပ်သင့်သည်က ခရီးလမ်းပန်း အဆင်ပြေရေး၊ အလှူရှင်တွေကို ကူညီရေးနှင့် ဒေသခံတွေကို တတ်အားသမျှကူညီရေးဖြစ်ပါသည်။ ကားတန်းကြီး အဆမတန်ရှည်လာသောအခါ လူတွေက ပူညံပူညံဖြစ်ကြပါပြီ။ ကြိန်ဆဲကြပါပြီ။ ဒီကြားထဲ လှူတာခြင်းအတူတူ `အဲပုဂံ´တံဆိပ်နှင့် ကားရှေ့တွင် `H´ဟု အမှတ်သညာပြုထားသော တေဇ၏ ထူးကုမ္ပဏီက ကားတွေက အခွင့်ထူးခံအဖြစ် တန်းမစီဘဲ ၀စီ တရွှီရွှီဖြင့် အရှေ့ဆုံးရောက်အောင် ကျော်တက်ကြပါသေးသည်။ သြော် အလှူပြုတာတောင် သူတို့က အခွင့်ထူးခံသေးသကိုးဟု အောက်မေ့မိသည်။ လာတာက ဇိမ်ခံကားနှင့် ဘာတွေ လှူမလဲတော့ မသိ။ ကျနော်တို့ အပါအ၀င် တော်တော်များများကတော့ ဘတ်စ်၊ ဒိုင်နာကြီးတွေ၊ ရိန်းဂျားကြီးတွေနှင့် ပစ္စည်းတွေ တနင့်ပဲဖြစ်သည်။

သာသနာ့အလံ ရန်သူတဲ့လား

ကားတွေတသီကြီး မရွေ့နိုင်။ ကားမှာပါသည့် ဦးပဇင်းက လက်မှတ်ရဖို့သွာတိုးသည်။ ကျနော်နှင့် ဦးဆောင်သူ လူငယ်တို့လည်း ထိုနားရောက်သွားသည်။ ဦးဇင်းမှာ လူမတိုးနိုင်ဖြစ်နေသည်။ ဦးဇင်းက
ု အသာလက်ကုပ်ပြီး အခြေအနေမေးရသည်။ ရှုပ်ယှက်ခတ်နေသည်ပဲ ပြောနိုင်သည်။ ကျနော်က `သာသနာ့ အလံတင်ပါလား´ဟု အကြံပေးမိသည်။ ဦးဇင်းနှင့် ဦးဆောင်လူငယ်က `ဟာ အဲဒါ ပိုဆိုးတယ်။ ပိုရစ်ခံရလိမ့်မယ်´ ဟု ပြောသောအခါ ကျနော် Shock ဖြစ်သွားသည်။ သာသနာ့ အလံသည် စစ်အစိုးရအဖို့ ရန်သူဖြစ်နေပြီလား ဟု တွေးမိသောအခါ စိတ်မကောင်းခြင်းကြီးစွာဖြစ်ပြီး ခေါင်းငိုက်စိုက် ကျမိတော့သည်။

`မောင်း..မောင်း´`ဟေး..ဟေး´ ဟု ၀ိုင်းအော်သောအခါ Check Point က စာရင်းမှတ်တဲ့ ငတိတွေ စာအုပ်ချိုင်းကြားညှပ်ပြီး အထဲဝင်ပြေးသည်။ ပြီးတော့မှ ပြန်ထွက်လာပြီး ကားတန်းကို လန့်သွားပုံရသည်။ ခပ်မြန်မြန် သွားခွင့်ပြုသည်။

ဒါကူညီတာ မဟုတ်ဘူး၊ နှောက်ယှက်နေတာ ဟူသော အတွေ့အကြုံသည် လူတိုင်းရင်ထဲမှာ ခါးသီးစွာ စွဲထင်သည်။ လူငယ်တွေက ရင့်ရင့်သီးသီး ဟာသလုပ်သည်။ ဆဲဆိုခြင်းဖြင့် ပွင့်အန်ထုတ်ပစ်လိုက်သည်။

ရန်ကုန် အမှိုက်ပုံ

နေရာတော်တော်များများတွင် တီးတိုးပြောကြသည့် အရပ်စကားရှိသည်။ မြန်မာအယူ `တဘောင်´ဟု ဆိုရမလားမသိ။ `မန္တလေး ပြာပုံ၊ ရန်ကုန် အမှိုက်ပုံ၊ ပျဉ်းမနား အရိုးပုံ´တဲ့။ မန္တလေးလည်း မီးလောင်ပြီးပြီတဲ့။ ရန်ကုန်လည်း အခု အမှိုက်ပုံဖြစ်နေပြီတဲ့။ တစ်ခုပဲ ကျန်တော့သတဲ့။

တကယ်ပဲ အမှိုက်ပုံဖြစ်ပါသည်။ အပျက် အဆီးများမှာ ပစ္စည်း အမယ်စုံကို အိုးထဲထည့်မွှေသလို ဘာပစ္စည်း ဘာ ခွဲလို့ မရလောက်အောင် အမှိုက်သဖွယ်ဖြစ်နေပါသည်။ ခရီးစလာပြီ ဆိုသည်နှင့် အဝေးက မြင်နေရသည်မှာ ကုန်းပေါ်မှ ထီးကျိုးနေသာ စေတီများ။ တန်ဆောင်း ပြဿဒ်တွေက ဘုံထွတ်တွေ မြေခကုန်သည်။ အချို့ စေတီကြီးများမှာ ငှက်ပျောဖူးမှ ပြတ်၍ ထွက်သည်။ အိမ်တွေက နှစ်အိမ်ခြား၊ သုံးအိမ်ခြား ပြိုသည်၊ ပြားသည်။ လဲသည်။ ပြုတ်ထွက်သည်၊ ပွင့်ထွက်သည်။

အချို့အိမ်တွေက တတ်နိုင်တော့ ပြင်ပြီးပြီး။ သွပ်တွေ၊ သစ်တွေ တပြောင်ပြောင်။ တချို့ အိမ်ပြိုထဲမှာပဲ ရရာ ကျားကန်ပြီးနေကြသည်။ တချို့က အိမ်ကို စွန့်ပြီး တရွာတကျီ ဆွေမျိုးရှိရာ ပြောင်းကြပြီ။ (ဒုက္ခသည် စခန်းမှာ ရောက်နေတာ ဘယ်သူတွေလည်းတော့ မသိပါ။)

အဖိုးကြီး၊ အဖွားကြီး၊ ကလေးတွေ၊ ကလေးငယ်တွေနဲ့ မိန်းမတွေ၊ ဘုန်းကြီးအိုတောထွက်ကြီးတွေ ကားလမ်းတစ်လျောက် စီရရီ။ မျှော်လင့်ချက်တွေ သူတို့မျက်လုံးမှာ လက်နေသည်။ သူတို့သည် အိနြေ္ဒပျက် မတောင်းကြပါ။ `တာ့တာ´ဟု လက်ပြသည်။ ကျနော်တို့ကားခေါင်းခန်းတွင် သင်္ကန်းရုံလျှက်သား မဟာစည်ကိုယ်တော် တစ်ပါးပါတော့ အားကိုးရာဟု လက်အုပ်ချီမိုးကြသည်။ စာသင်ကျောင်းတွေမှာ အုတ်ဖိနပ်ပဲ ကျန်သည်။ ရှေ့မှာ ပြုတ်ကျနေသော ဆိုင်းဘုတ်ကြောင့်သာ စာသင်ကျောင်းဟု သိရသည်။ ပြန်လည်ထူထောင်ဖို့ တော်တော်နှင့် လွယ်တော့မည်မဟုတ်သော ကျေးရွာစာကြည့်တိုက်လေးတွေမှာ ပြားပြားဝပ်နေသည်။ ရေစိုပြီး ပွနေသော၊ ပုံပျက်နေသော စာအုပ်ပိုင်း၊ စာရွက်ပိုင်းတွေက ပြန့်ကျဲလျက်။

တကယ့် ဒုက္ခသည်စခန်း

ရှိုးနှင့် စမိုးနှင့်
အရှေ့မှာ လယ်သာပုံနှိပ် (ဗိုင်နယ်) ဆိုင်းဘုတ်ထောင်ထားသော ဒုက္ခသည်စခန်းတွေမှာ ဒုက္ခသည် စခန်းနှင့် မတူပါ။ ရှေ့တန်းထွက်သည့်တပ် စခန်းချနေသည်နှင့်တူသည်။ ရဲနဲ့ စစ်တပ်၊ စစ်ကား၊ ဆိုင်ကယ်၊ ဝေါ်ကီ တော်ကီတွေ မည်းမည်းလှုပ်နေသည်။

တကယ့် ဒုက္ခသည်စခန်းတွေ ရွာတိုင်းမှာ တွေ့ခဲ့ပါသည်။ တဲရုံမဆန့်၍ အပြင်ထွက်ထိုင်နေသူများနှင့်၊ အုပ်ချူပ်စီမံပေးသူ ဘုန်းတော်ကြီးများ ရဲရဲလှုပ်နေသည့် ဘုန်းကြီးကျောင်း အမိုးပွင့်၊ နံရံပြို၊ အကာမဲ့များဖြစ်ပါသည်။ ကျောင်းရှေ့တွင် တချိန်က ကိုယ်တော်လေးတွေ သင်္ဂြိုလ်သရုပ်ခွဲသည့် ကျောက်သင်ပုန်းမှာ ယခုအခါ ဒုက္ခသည်စခန်း ဆိုင်းဘုတ်ဖြစ်လာသည်။ `ဤကျောင်းတွင် ဒုက္ခသည်များ ခိုလှုံနေပါသည်´`လှူဒါန်းနိုင်ပါသည်´ဟု မြေဖြူနှင့်ရေးထားသည်။

တပ်ချစခန်းနှင့်တူသော ဒုက္ခသည်စခန်းမှာ လှူသူမရှိ။ ဓနိတဲရှည် ဖြစ်သလိုဆောက်ထားသော ဘုန်းကြီးကျောင်းက သာသနာ့ဒုက္ခသည်စခန်းမှာ အလှူကားတွေ မစဲ။ ဒါကိုပင် စစ်တပ်ကတချို့၊ အရပ်ဝတ်နဲ့ကတချို့ မကြည်သလို ယောင်ပေပေနှင့် ရစ်သီရစ်သီကြည့်သည်။ ထိုအချိန်တွင် ရေလေးပါရင် တိုက်စမ်းပါဟု အဖွားအိုတစ်ယောက်ကပ်လာသည်။ ချိုချဉ်လေးတစ်လုံး၊ ဘီစကစ်လေးတစ်ချပ်ပေးလိုက်လျင်ပင် လူကြီးတွေတန်မဲ့ ပျော်နေကြသည်။ ရေကို ချက်ချင်းသောက်သော်လည်း မုန့်လေးတွေ သိမ်းထားကြသည်။ ခင်ဗျား စဉ်းစားကြည့်လေ။ ဒါ မိဘမဲ့သွားသော သူတို့ မြေးလေးတွေ အတွက် ဖြစ်နိုင်သလို၊ သူတို့အတွက် နေဖို့ညစာလည်း ဖြစ်နိုင်ပါတယ်။ ယုတ်စွ အဆုံး အိမ်နီးချင်း မိဘမဲ့ လူမမယ်လေးတွေ အငိုတိတ်ဖို့လည်း ဖြစ်နိုင်ပါတယ်။

ကျနော်ကတော့ မျိုမကျလို့ ဘာမှ မစားဖြစ်ဘူး။ ရေတစ်ငုံ နှစ်ငုံရယ်၊ အံကြိတ်ထားဖို့ ကွမ်းတစ်ယာပဲ ခရီးသွားဖော်ဆီက တောင်းပြီး ၀ါးနေခဲ့သည်။

သင်ကာ

၂၅ မေ၊ ၂၀၀၈

Leave a comment

Filed under Experience, Nargis