Proverbs in Post

(မနက်က မြန်မာစကားပုံတွေ စုတင်ထားတဲ့ ဝက်ဘ်ဆိုဒ် (Click Here) ကိုတွေ့တော့ ရတနာသိုက်ပဲဆိုပြီး မွှေနှောက်ဖတ်ပါတယ်။ ဆရာလှသမိန်ရဲ့ “မြန်မာစကားပုံ – အဓိပ္ပာယ်နှင့် သုံးနည်း”စာအုပ်ထဲကနေ ကူးယူရိုက်တင်တယ်လို့ ဆိုပါတယ်။ စာရိုက်အမှားတွေ မြင်သလောက် ကော်မန့်ပေးခဲ့ပါတယ်။ ဖြည့်စွက်စရာ စကားပုံတွေ လာရေးပေးရင် ထပ်ထည့်မယ်လို့ဆိုပါတယ်။ လျှောက်ဖတ်ကြည့်ရင်း စိတ်ကူးရတာနဲ့ ဆိုင်ရာ စကားပုံတွေ ဆွဲထုတ်ပြီး အောက်က ပို့စ်ကို ရေးကြည့်ပါတယ်။ အဓိပ္ပာယ်တွေ မသိရင် အဲဒီဆိုဒ်မှာ ရှာဖတ်နိုင်ကြပါတယ်။ တချို့တလေကတော့ ဝက်ဘ်ဆိုဒ်မှာ မပါသေးပါဘူး၊ ကိုယ့်ဖာသာ သင့်သလို ဖြည့်ရေးထားတာပါ။)

“ဝှေ့ချင်တဲ့နွား ဝှေ့ဖက်ရှာ”တဲ့ လူတွေနဲ့ ကြုံမိတာကြောင့် “အသက်တစ်ရာမနေရ အမှုတစ်ရာပွေရ”ဆိုသလို ခုတလောဖြစ်ရပေသည်။ “ကရဏီယနဲ့ ဆွမ်းစား၊ အံသွား ဗထက်ချိုက်”ဖြစ်နေပါပြီဆိုပြီး “ကိုယ့်ဂုဏ်ကိုယ်ဖော် မသူတော်”တွေကိုမှ “သူခိုးလက် ဘဏ္ဍာတိုက်သော့ အပ်မိ” သည်။

“ဆံထုံး ထုံးတတ်တော့ ဆီစိုက်ရ”ဆိုသလို “ကိုယ့်ထမင်းကိုယ်စားပြီး ကြီးတော်နွားကျောင်း” စေတနာနှင့်ကူမိကာမှ “လှော်ကားကို ဝန်တင်ချင်”သူတွေကြောင့် “တမိုးလုံးဖျောက်ဆိတ်”လုပ်နေသော်လည်း “ရွှံပုတ်လျှင် မျက်နှာစင်”မည့်အရေးကိုမြင်၍ ခပ်ဝေးဝေးနေရချေသည်။ “ဘူးသီးမှ အရီးလာတော်”ပြီး “ဆန်ပေးမှ ဆေးရတယ်” ဆိုကြချင်သေးသည်။ “ဆပ်ပြာကောင်းလို့ ခေါင်းပေါင်းဖြူ”တာကို သတိမရ။ “ခွေးရူးနဲ့ကိုက် ခွေးကောင်း နားရွက်ပြတ်”တတ်တာမို့ “အပေါ်ယံ ရွှေမှုန်ကြဲ အထဲက နွားချေးခံ”သူတွေကို မသိယောင် ပြုရသည်။


“မီးဖုတ်၍ တစ်ဆုပ်မရနိုင်သည့် ဝါဂွမ်းတစ်လှည်းစာ”နှင့် “အတောင့်မကြီး အသီးမမာ” “ငါနှင့်ငါသာ နှိုင်းစရာ”လုပ်ချင်ကြသေးသည်။ ဒီတော့လည်း “ဝါးဆွေးကို ချွန်၍ ထက်မထက်မသိ”ပါဘဲ “ဝါးလုံးခေါင်းထဲ လသာ”ပြီး “ရှင်နည်းရာ အဂ္ဂလူထွက်”ထားတဲ့ တပ်မှာ “နောက်လိုက်မရှိဘဲ ဗိုလ်လုပ်ချင်”သူတွေပဲဟု မှတ်ရတော့သည်။ “ငါ့မြင်းငါစိုင်း စစ်ကိုင်းရောက်ရောက်” ဆိုပေမယ့် “သူများချေးကိုယုံ၍ ဝက်မွေး”သလို “အထက်လွန်ကျစ် အောက်ခွေးစား”ဖြစ်သည်ကိုလည်း သိပုံမရ။ “ထမင်းကြမ်းက အငွေ့ထွက်ချင်”ပြီး “ကွန်လေးသစ်ကွင်းနှင့် အုပ်ချင်တာက ငါးကြင်း”ဖြစ်သည်။ သို့သော် “ဖွတ်မရ၊ ဓားမဆုံး”ဖို့သာမြင်သည်။

နအဖ ယက်တောနဲ့အမှုဆင်သလို “ပိုင်တယ်ထင်ပြီး ခြင်ရိုက်”ကာ “သူခိုး လူဟစ်”ပြီးမှ သူတို့မှာ “ရေမရှိတဲ့အရပ် ချေးကိုင်မိ”၊ “လူပါး ပုလင်းထိ”ဆိုသလို ဖြစ်နေကြောင်းတွေ့ရ၍ ရယ်ရပေသေးသည်။ “သုံးထမ်းပိုးကျမှ အရွသင်ချင်”ပေမယ့် ကိုယ့်ကိုယ်ကို “ကြီးလေချဉ်လေ သံပရာသီး”ဖြစ်မှန်းမသိဖြစ်ကာ “သောင်ပြင်လွှတ်သည့်ခွေးပမာ” “မျောက်သစ်ကိုင်းလွတ်” ဖြစ်နေပေသည်။

“မလိုတော့မှ ကူးတို့ခ”ကို အရှက်မရှိ တောင်းကြသည်။ “ကြွက်မနိုင်တော့ ကျီမီးနဲ့ ရှို့”မယ်ဆိုပြီး လာလုပ်ပေမယ့်လည်း “ထိုင်နေအကောင်းသား ထသွားမှ ကျိုးမှန်းသိ”ရှာကြလေသည်။ “ညောင်မြစ်တူးရင် ပုတ်သင်ဥပေါ်”သည်သာ။

“အနာပေါ် တုတ်ကျ”ပြီး “အကျည်းတန် စကားတန်ထွက်”ဆိုသလို “ငါ့စကားနွားရ”ဆိုလာသော်လည်း “အပ်ဝင်ပြီး ပုဆိန်ထွက်”သည့်အရေးကြောင့် “လူမလေး ခွေးမခန့်” ရှိရှာသည်။ “ခြင်္သေ့မှန် မှင်ဆံ သက်သေ” ရှိပြီးဖြစ်၍ “ခွေးလှေးခုန်၍ ဖုန်ထမည်”မဟုတ်။ “အောက်ကလည်းနေသေး လေကလည်း မလျှော့”ချင်၊ “ငါးပိဖြစ်ကာမှ အမြီးက နန့်ချင်”သည်။

“တလင်နေလည်း ပွေးနှင့် တလင်နေလည်း ကြွေးနှင့်”ဖြစ်ခဲ့သူကို “ဒီပုပ်ထဲက ဒီပဲ”ဟု အထင်မသေးခဲ့တာ ကိုယ့်အမှား။ “ဒီယုန်မြင်လို့ ဒီခြုံထွင်”တာကို “ဖွဲကိုထောင်း၍ ဆန်ကောင်းရနိုင်မည်”ဟု ယုံမိလို့ “ငါးပိဖုတ်ကို မျက်နှာပေး၍ ရွှေရေးပန်းကန်တက်”ဖြစ်ခဲ့ပြီ။

“အပ်ဖင် ချည်မျှင်တန်းလန်း” ရှိပါလျက် “သုံးစလောင်း ကုန်မှ ဂျုံမှန်းသိ” “ကြာကြာဝါးမှ ခါးမှန်းသိ”တာကလည်း ကိုယ့်အပြစ်။ သို့သော် “ငါးရုတ်သီးထဲကပိုးဖြစ်၍ အစပ်မျိုးတော့ မကြောက်”ခဲ့ပါ။ “စပါးကြီးကို လင်းမြွေပတ်ချင်”၍ မရ။ ဘာဖြစ်ဖြစ် “ချေးထဲကလောက် ချေးထဲပျော်ဆိုပြီး” ပေယျာလကံထားကာ “ခွေးညိုသုန် ချေးကုန်နည်း”တာပဲဟုအောက်မေ့၍ “နေသာသပ လေညာက”ဆိုပြီး မပတ်သက်မိတော့မှပဲ “ကွမ်းသီးကြိုက်သူ တောင်ငူအပို့ခံ”ရသလိုစိတ်ပေါ့သွားသည်။ ပြောချင်တာပြောကြပါစေ၊ “မြွေမှန်လျှင် တွင်းဝင်ဖြောင့်”ပြီး “ပန်းညိုမျိုးကတော့ ချိုးလေစည်လေ”သာ ဖြစ်ကြောင်း။

သင်ကာ

ဇွန်၊ ၂၀၀၉

Advertisements

8 Comments

Filed under Literature

8 responses to “Proverbs in Post

  1. ငု၀ါ

    ေကာင္းပါေလ႔ … မသိေသးတဲ႔စကားပံုေတြရလိုက္တယ္

  2. ႔yyn

    ဖတ္လို႕ေကာင္းတယ္။ စကားပံုေတာ္ေတာ္မ်ားမ်ားက တစ္တစ္ခြခြေတြပဲ။ ဆံထံုးထံုးတတ္ေတာ့ ဆီစုိက္ရဆိုတဲ့ စကားပံုကို ၾကိဳက္တယ္။ သူမ်ားေခ်းကိုယံုေရြး ဝက္ေမြးဆိုတာလည္းပဲ။

  3. မိေက်ာင္းမင္း ေရကင္းျပမလုပ္ေတာ့ပါဘူး။ ၾဆာေရ .. ေရးတတ္ပါေပ့ဗ်ာ။ ဟီးဟီး..

  4. မင္းက်န္စစ္

    မသိေသး မသံုးျဖစ္ေသးတဲ့ စကားပံုေတြ အမ်ားႀကီးပဲ သိခြင့္ရလိုက္တယ္ ကိုသင္ကာေရ။

  5. မၾကားဖူးတာေတြကမ်ားတယ္
    ရယ္လည္းရယ္ရတယ္
    ေတာ္ပါေပ့..။

  6. admin

    လာဖတ္ၾကတာ ေက်းဇူးပါ။

    ျမန္မာစကားပံုေတြ အကုန္လိုက္ဖတ္ေတာ့ တစ္ခုသတိထားမိတယ္။ အဆီအေငၚမတည့္၊ အခ်ိဳးမေျပတာေတြကို တစ္တစ္ခြခြ ဒုတ္ဒုတ္ထိ ေျပာထားတာေတြက ပိုမ်ားတယ္ဗ်ိဳ႕။

  7. ပ်ံေလသည္႕ငွက္ခါး နားမွသိမယ္ အစားမေတာ္ တစ္လုတ္ အသြားမေတာ္ တစ္လွမ္းတဲ့ အေၿပာမေတာ္ရင္လည္း တစ္ခြန္းၿဖစ္မယ္ သတိထားအံုး

  8. linn hlyan hlaine

    ကိုဟန္သစ္ၿငိမ္ ဘေလာ့ဂ္မွာ တိရိစၦာန္ ေမတၱာစာဆိုတဲ့ ပို႔စ္မွာလဲ တိရိစၦာန္နဲ႔ ခိုင္းႏိႈင္းသံုးတဲ့ စကားပံု ဆိုရိုးမ်ား ရွိပါ၏။ ေလ့လာ ဖတ္႐ႈ ၾကားျမင္သုတ ပြားၾကပါကုန္။