Site Guide

လတ်တလော ညွှန်းချင်တဲ့ ဆိုဒ်လေးတွေပါ။

မြန်မာစာအုပ်ကတ်တလောက် (http://myanmarbooks.ning.com/)

မြန်မာစာအုပ်ကတ်တလောက်၊ အညွှန်းအကျဉ်းနဲ့ မိတ်ဆက်တွေ တွေ့နိုင်ပါတယ်။ ညီလင်းဆက်က စလုပ်ပြီး ကျနော့်ကို လာဖိတ်တာနဲ့ ကျနော်လည်း မော်ဒီရေတာ အနေနဲ့ပါပါတယ်။ နောက်မော်ဒီရေတာတစ်ယောက်ကတော့ ချိုဇင်ပါ။ Ning ဆိုရှယ်နက်ဝပ်ပေါ်မှာ ဆိုဒ်ကို ဖန်တီးထားပါတယ်။

စာအုပ်ရှေ့ဖုံး စကန်ပုံနဲ့အတူ စာအုပ်ရေးသူ၊ အမျိုးအစား၊ ထုတ်ဝေနှစ်၊ မူပိုင်နဲ့ မှတ်ပုံတင်အမှတ်တွေကို ဖော်ပြထားပါတယ်။ အများအားဖြင့်တော့ စာအုပ်မိတ်ဆက်ကို မရေးရသေးပါဘူး။ စာဝါသနာအိုးတွေ၊ ကျောင်းသားတွေ၊ ပညာရှင်တွေနဲ့ သုတေသီတွေအတွက် အသုံးဝင်လာဖို့ မျှော်လင့်ပါတယ်။

စာအုပ်ကတ်တလောက်အပြင် စာအုပ်၊ စာရေးဆရာများနှင့် ပတ်သက်၍ ဆွေးနွေးခြင်း (ဥပမာ – ဂျူးရဲ့ မိန်းမတစ်ယောက်၏ ဖွင့်ဟဝန်ခံချက်)၊ စာဂျပိုး၊ စာအုပ်စုဆောင်းသူများရဲ့ အတွေ့အကြုံ အတွေးအမြင် (ဥပမာ – သေလောက်အောင် မုန်းပါတယ်)၊ နောက်ပြီး စာအုပ် ဝယ်ရောင်း လုပ်ဖို့လည်း ကဏ္ဌတို့အပြင် အပျင်းပြေအောင် မေးချင်ရာမေးကဏ္ဌ (ဥပမာ – ဓာတ်ပုံရိုက်ရင် ကောင်မလေးတွေ ဘာကြောင့် လက်နှစ်ချောင်း ထောက်ကြသလဲ) လည်း ရှိပါတယ်။ ကိုယ်ပြောချင်တာရှိရင် မမ်ဘာလုပ်ပြီး ဝင်ရေးနိုင်ပါတယ်။

မိမိစုဆောင်းထားတဲ့ စာအုပ်စာတမ်း၊ ကျမ်း၊ စာစောင်တွေ တင်နိုင်ကြပါတယ်။ ဘယ်လိုတင်ရမယ်၊ ဘာတွေထည့်ရမယ်ဆိုတာကို ဆိုဒ်ပေါ်မှာ ကြည့်ကြပါ။ တစ်ခုသတိပြုဖို့က မြန်မာစာအုပ်ကတ်တလောက်ဟာ စာအုပ်အညွှန်းသက်သက်သာဖြစ်ပါတယ်။ အီးဘုတ်တွေ တင်ပေးထားတာ မဟုတ်ဘူး ဆိုတဲ့အချက်ပါ။ အီးဘုတ်ခ်ရနိုင်ခဲ့ရင် လင့်ခ်ညွှန်းပေးတာ တွေ့ရပါလိမ့်မယ်။


မြန်မာ Ubuntu သုံးစွဲသူများ (http://ubuntu-myanmar.org/)

Ubuntu ကို ကိုဘေဘီတိုးက ကိုသင်ကာကြီး ဖွပါဦးဗျ ဆိုတာနဲ့ ညွှန်းလိုက်ပါဦးမယ်။ (ကျနော်ကတော့ နားလည်တာ မဟုတ်ပါဘူး။) Ubuntu နဲ့ပတ်သက်လို့ မြန်မာလို ရှင်းပြ၊ အကူအညီပေးမယ့်ဆိုဒ်ပါ။ နည်းပညာတွေ မြန်မာဘာသာနဲ့ လွယ်ကူစွာ ကူညီ သင်ပြတဲ့ ဆိုဒ်တွေ ပေါ်ပေါက်လာတာ ကြိုဆိုပါတယ်။

ဂျူးမလားနဲ့ပတ်သက်လို့ လုပ်ကြပါဦး၊ ပညာတွေ မျှကြပါဦးဆိုတော့ Expert ဖြစ်တဲ့ ကိုမင်းကျော်ကို မေးပါတဲ့။ ကိုင်းရွာစားကိုမင်းကျော်ရေ


ပိဋကတ်သုံးပုံ မြန်မာပြန်

(http://www.dhammadownload.com/MyanmarTipitaka-eBook.htm)

ထေရဝါဒတက္ကသိုလ်က အရှင်အာစာရက ဓမ္မဒါနပြုပြီး တင်ပေးထားတာပါ။ မြန်မာလို အစုံလိုက် အပြည့်ဝယ်ဖို့တောင် မလွယ်လှချိန်မှာ လျှပ်စာအုပ်အနေနဲ့ထွက်လာတာ ဝမ်းသာစရာပါ။ ပိဋကတ်ဆိုပြီးလန့်မသွားပါနဲ့။ ပါဠိလိုရေးထားတော့ နားမလည်လို့သာ။ မြန်မာပြန်ကို ဖတ်ကြဖို့ တိုက်တွန်းပါရစေ။ ဝိနည်း၊ သုတ္တန်နဲ့ အဘိဓမ္မာမှာ ဘယ်သူမဆို ဝိနည်းနဲ့သုတ္တန်ကို့ ဖတ်လို့ကောင်းကောင်းနားလည်နိုင်ပါတယ်။

ပထမဆုံး ဝိနည်းက စဖတ်ပါ။ အားလုံးဟာ ဇာတ်လမ်းဇာတ်ကွက်ကလေးတွေနဲ့ သွားတာပါ။ ပျင်းစရာ တရားထူထူကြီးတွေ မဟုတ်တာ တွေ့ရပါလိမ့်မယ်။ (အဘိဓမ္မာမှအပပေါ့လေ။) မျိုးဆက်သစ်တွေ မြန်မာစာအရေးအသား ဆင်းရဲတာ ပိဋကတ်ကျမ်းစာ အရေးအသား အသုံးအနှုန်းတွေနဲ့ စိမ်းလို့လို့ အမြဲထင်မိပါတယ်။ ပိဋကတ်မှ မဟုတ်ဘူး သမ္မာကျမ်းဖတ်တာလည်း ကောင်းပါတယ်။ သူငယ်ချင်းကဗျာဆရာက ဘိုင်ဘယ်ကို လွယ်အိတ်ထဲ အမြဲဆောင်ထားတယ်။ ပို့စ်မော်ဒန်ရေးရင် ဘိုင်ဘယ်က အလွန်အသုံးဝင်သတဲ့။ Usage တွေ ပြောတာ။

ပို့စ်တင်ဖို့ တကယ်ရေးချင်တာက တခြားအကြောင်းအရာတွေပါ။ လောလောဆယ် ရေးသင့်တာကို အရင်ရေးလိုက်ပါတယ်။

သင်ကာ

မတ်လ ၂၀၀၉

Advertisements

1 Comment

Filed under e-Book, IT & Blogging, Religion

One response to “Site Guide

  1. Joomla ကြ်န္ေတာ္ေရးမယ္..။ အစ္ကို PDF အျပင္အဆင္ လုပ္ေပးမလား ? 😀 😛